二匹之鬼位於九重町，也在九重夢大吊橋附近，大約十分鐘車程便到，不過好容易就飛過咗個入口，因為轉完個急彎之後會見到二匹之鬼個牌，若一不留神就會睇唔到。可能我上網睇過網友介紹，所以個路牌一出現我就立刻注意到，轉咗入去之後會上一段大斜路，跟住就會到Check in 0既地方。
以下就係
Check in 0既位置啦，若大家去到的話，千萬唔好放行李落車呀，因為
Check in 完還要去你住的房間啊！
入到去之後個旅館職員會俾張地圖你，教你點樣開車到你住的獨立屋。
二匹之鬼係我上網搵的一家溫泉旅館，係我最期待的其中之一間旅館。
第一，因為二匹之鬼住0既係獨立屋，私隱度夠高，我去浸溫泉或者用膳都要行大約 一百米 ，所以我哋通常都係開車落去的。
第二，因為房間超大、超舒適，就算我哋只係兩大一小，間獨立屋都係俾咁大間，淨係睡房都放咗三張「他他咪」。
第三，屋入面有一個露天的木桶溫泉，可以自己一個人獨霸這個溫泉，正！
第四，因為二匹之鬼獨立的溫泉夠多，任我浸到夠，一日真係浸唔哂所有溫泉。
第五，每個溫泉都面向住山光景色，非常咁美麗，好似回歸大自然一樣。
所以我真係超喜歡這裡！100000 個讚。
當我整頓好行李之後，就急不及待地要去睇睇啲溫泉，首先去睇睇家族風呂先。二匹之鬼總共有五個家族風呂，每個風呂門口都有個牌，若寫著「空」，即表示沒有人使用。入住時職員會俾埋家族風呂條鎖匙你，咁你就用你條鎖匙開門就可以享用啦，當然唔好忘記要反一反個牌，將佢變為「入浴中」，俾人知道你正在享用中。
我到0既時候五間家族風呂都沒有人使用，所以我逐間入去拍下每個風呂的環境。聽講每個風呂的水質都有不同，對不同的疾病有不同的功效，但我沒有時間去研究了，因為全部係日文…….唉！日本人真係堅持只用日語。
影完家族風呂之後，就去隔離的露天風呂，露天風呂係分咗男湯及女湯，由於男湯、女湯都冇人浸緊，所以我將兩個露天風呂的影下來。我相信露天風呂的環境係最靚的，連一向高要求的麵包媽都讚不絕口，加上我入去影0既時候係落緊雨，氣氛、環境及溫度真係絕配。
攪咗咁耐終於都有得浸啦！專程為九州溫泉之旅而買給麵包囡的，好可愛呢。
Go Go Go ……….. 浸泉我嚟啦！連麵包囡都一齊浸，我諗麵包囡都好喜歡浸溫泉啊。
到咗晚飯時間，唔駛多講，當然食物豐富啦，所以我都唔多介紹，大家睇相啦。我反而想講講佢哋0既服務，由於我哋食晚飯時，可能麵包囡浸完溫泉後有點累，所以食食吓就瞓著咗，個服務員見到此境況竟然捧咗張BB床入嚟，讓我哋可以放下麵包囡，安心用膳！真係好細心呀 ~~~
食完晚飯之後，我哋就周圍逛逛，睇睇有什麼新發現……….果然俾我哋發現到呀！因為我在好多網頁的介紹都沒有介紹到的，可能太過隱蔽0既關係啦，在 Check in 0既地方隔離有度神秘0既門，我以為係又有另外的溫泉，所以同麵包媽一齊去探過究竟，一開門就有一條往下的樓梯，一落樓梯之後就發現…………好大的泳池呀！噢…………..竟然咁正有埋泳池，但由於食得太飽，所以對於鍾意游水的我也游不了，若我下次再有機會嚟的話，我一定試佢一試。
可能可太過興奮啦，我瞓到早上6點就起了床，起了身又瞓唔返，就自己開車去浸一浸露天溫泉啦！一出門口就發覺霧氣好勁，在浸溫泉的地方，好似仙境一樣，真係好享受。
最後，到了早餐時候，一入到去就見到BB床早已放在飯桌的隔離，真真細心！而我最喜歡的就是炭燒魚呀，這是另我有驚喜的食物之一，也是最好味道早餐。
總的來說，二匹之鬼係我極力推薦大家一試的溫泉旅館。 不論食物、住宿、溫泉、服務態度都係一流水準，多謝二匹之鬼讓我可以有如此的享受！麵包媽就建議若可以多幾個人一齊住就更好玩，我也同意，希望下次可以啦。
沒有留言:
張貼留言