第一站：高崎山動物園
我哋大約九點出發，開大約半小時的車程就由大分東橫 INN 去到高崎山動物園，今次主要睇0既係馬騮仔。麵包囡都係第一次去見真的馬騮，好緊張呀！
去到高崎山動物園停車場泊好車之後還要行大約十分鐘先至到纜車站，好熱呀！沿路都係露天的，真辛苦。
好彩纜車站的候車室係有冷氣的，否則真係熱死人呀！咁舒服，就襯這段空餘時間影下相啦。
當纜車到達目的地時，剛剛是餵食時間，啲馬騮從四方八面衝入同一個範圍裏面，我估都有六百隻以上，好震撼呀。啲馬騮仔食完嘢之後好多都四散，但都只係在這個公園裏面，佢哋好似知道這個是牠們的家一樣，不會走得太遠，所以現在我哋一家都在馬騮群之中。當然觸摸佢哋就應該唔得，因為我見到有一個巡邏員望住各遊客，只要你行得好近啲馬騮仔的話，巡邏員都會「目及」實你...........所以我哋都只係行近一點同啲馬騮仔影下相。
咁多馬騮之中，我發現不少是馬騮 BB，非常細隻，有啲就攬住媽媽個身體，好似袋鼠咁，好有趣！
到我哋差不多走0既時候，動物園職員竟然再次餵馬騮仔，這次我目睹整個過程，啲馬騮仔好似知道個位職員去攞食物咁，佢哋由四方八面跑來等食，好瘋癲！我立刻錄影咗個過程，但由於容量問題冇放上來，想睇的話找我吧！
當我哋搭纜車返到落去0既時候，我哋目睹一宗搶劫案的發生，一位日本老人家俾一隻馬騮仔搶佢手裏面拿著的東西，但老人家極力反抗之下，力保大部分的東西，隻馬騮只係搶得一頂 Cap 帽仔，搶到手之後立刻走入叢林裏，老人家的家人立即找職員幫忙，其實大家都知道好難搵返隻馬騮仔，但個職員真係好好人，佢走來走去仲不時在大叫，我估應該係叫緊隻馬騮仔，不過都好似冇咩反應，之後搵唔搵得返就真係唔知啦。
離開咗動物園之後我哋就開車往九重薰衣草園，途經見到山下池這個地方就停下來，食我哋0既午餐。
見到有間小食店就入去睇睇有咩食先，這裏竟然有熊本名物，暫叫佢「牛肉卷」，係以牛肉包住一些飯，我哋每人叫咗一個，好好味！
第二站：九重薰衣草園
其實九重薰衣草園啲薰衣草應該過了最靚0既時候，但勝在夠多。而我最喜歡的就係大草地及以下這條寬闊的草道路，路旁滿佈了薰衣草，非常美麗。
有咁靚0既景，真係連唔係咁識影相0既我都可以影得好靚呀！
麵包囡都好喜歡這條草草道路，佢不停地在這條路上四圍走，最終又係唔捨得走，唯有我去捉佢返來啦！
第三站：九重夢大吊橋 (500円)
九重夢大吊橋係日本一，在網上好多網友去過九州的都會過來一看，所以我就睇下這個日本一。吊橋其實香港都有，不過香港的吊橋是車行，而這個吊橋就係俾人行的，我也是第一次能夠踏進吊橋上的啊！
九重夢大吊橋連接兩邊的山狹，所以在吊橋之上非常大風，我終於知道點解九州打風時，吊橋要封鎖啦，如果唔係個人都會吹走。當我踏入吊橋時，由於受著大風的影響，條吊橋係會左搖右擺的，我感覺就好似搭緊船一樣。
條吊橋真係好鬼死長，行咗好耐終於行到橋的中間啦，點解我知道行到中間？因為佢寫住囉！
吊橋兩側的景色確實不錯，仲有呀！最特別0既係條吊橋中間係有通心的格仔，等大家可以望到腳下的情況，真係增加了驚嚇程度呀。咁都俾你諗到，俾個讚個設計師。讚！
麵包囡佢竟然唔驚，係條吊橋裏不斷走來走去，仲不斷同啲遊客打招呼揮揮手，真係親善大使呀！
原來條九重夢大吊橋唔單只睇吊橋，還有另一個景點的，就係大瀑布，可能要專程地走一段路程才看到，所以我在網上面較少看到介紹。我心想，咁難得來到九州梗係睇埋佢啦，但由於麵包媽及麵包囡已經累到不堪，所以我決定單獨地行事，為大家報導一下。
原來真係幾辛苦呀！走一大段樓梯才到達這條大瀑布，我立刻拍了幾張相俾大家睇睇，在現場時，瀑布的流水聲是非常之大的，怪不得日本人叫佢震動之滝啦！
待續...............
沒有留言:
張貼留言